Konsehal dedo sa granada

KIDAPAWAN CITY , Philippines  – Isang konsehal ng barangay ang iniulat na nasawi habang limang iba pa ang nasugatan ma­ka­raan sumabog ang granada na inihagis ng ’di-pa kilalang lalaki sa karamihan ng tao sa Barangay Fort Pikit sa bayan ng Pikit, North Cotabato kamakalawa ng gabi.

Kinilala ni P/Insp. Elias Dandan, hepe ng Pikit PNP, ang nasawi na si Konsehal Sandab Manan, 42, ng nabanggit na barangay. Kabilang naman sa limang nasugatan ay sina Alman Dalgan, 31; Lamalan Silongan, 54; Romeo Lumigas, 35; Don­don Acosta, 16; at El Yumar Buda, 31, nakababatang utol ng Comelec in-charge ng Pikit na si Omar Buda at si Chairman Elpidio Buda ng Brgy. Poblacion.

Napag-alamang inihagis ang granada sa harapan ng bahay ni Buda kung saan maraming tao. May teorya ang pulisya na puntirya ng pag­papasabog ay si Chairman Buda na may pagbabanta sa kanyang buhay subalit nadamay ang iba. (Malu Manar)