Anak ng NPA kumander kinidnap

MANILA, Philippines - Pinaniniwalaang may kinalaman ang militar sa pagkawala ng isang anak ng kumander ang mga rebeldeng New People’s Army kamaka­lawa maka­raang kidnapin ng mga armadong kalalaki­han sa bisinidad ng Sitio Bago Aplaya sa Barangay Ta­lomo, Davao City.

Kinilala ni P/Senior Supt. Ramon Apolinario, ang bik­timang kapapasa pa la­mang sa National Teach­er’s Board Examination ay si Rebelyn Pitao, 21, guro sa St. Peter’s School sa Toril District at anak ni Leon­cio Pitao, kilala sa alyas Commander Parago.

Si Parago ay lider ng Pu­­lang Bagani Command ng New People’s Army na may operasyon sa mga lib­lib na bahagi ng Davao City.

Base sa police report, dakong alas-6 ng gabi nang maganap ang insi­den­te kung saan lulan ng traysikel ang biktima nang harangin ng mga arma­dong lalaki at sapilitang isinakay sa kulay puting van na may plakang LPG 588.

Kaagad naman kumilos ang mga tauhan ni Army Major Gen. Reynaldo Ma­pagu, hepe ng 10th Infantry Division sa Camp Pa­nacan, para tugisin ang mga kidnaper. 

Malaki ang paniniwala ng ina ng biktima na mga security forces ng pama­halaan ang nasa likod ng pagdukot upang mapa­suko ang NPA commander.

Samantala, inakusahan naman ni Bayan Muna Southern Mindanao chair at ex-Rep. Joel Virador, na ang militar ang pangu­nahing suspek sa pag­dukot sa biktima, subalit kinontra naman ni dating AFP 5th Civilian Relations group chief Major Medel Aguilar, ang akusasyon ni Virador at sinabing propaganda lamang ng mga mili­tanteng grupo ang nasa­bing isyu.

Magugunita na si Commander Parago ay sina­sabing nasa likod ng pag­dukot kay ret. Brig. Gen. Victor Obillo at aide nitong si Captain Eduardo Mon­tealto sa Sitio Kalatong, Baguio District sa Davao City noong 1998.

Nabatid din na ang grupo ni Parago ay sinasa­bing nasa likod din ng serye ng karahasan sa Davao. Joy Cantos at Edith Re­galado