Tinedyer nakuryente sa sunog

CEBU – Isang 17-anyos na lalaki ang iniulat na na­matay matapos na makur­yente habang sinisikap na apulahin ang apoy na tu­mu­pok sa bahay ng kani­yang amo sa Barangay Poblacion-II, Carcar City, Cebu noong Lunes nang gabi. Kinilala ang nasawi na si Mark Anthony Alesna, kasambahay ng negos­yanteng si Dante Alcorisa. Ayon kay FO1 Teodoro Lauglaug ng Carcar Fire Sub-Station, nagmula ang apoy sa ikalawang palapag ng tahanan ng pamilya Alcorisa matapos na maka­rinig ng pagsabog kaya na­damay ang ilang kabaha­yan at palengke sa na­bang­git na barangay. Na­pag-alamang kumuha ng timba at tubig ang biktima saka binuhusan ang apoy, subalit ‘di-namalayan na ang talop na linya ng kur­yente ay kanyang natapa­kan kaya naganap ang pag­salubong ni kamata­yan. Kaagad naman inila­bas ng mga kapitbahay ang biktima at sinubukang dalhin sa Carcar City District Hospital subalit idinek­lara itong patay. (Edwin Ian Melecio)