BULACAN — Trahedya ang sumalubong sa ikaapat na araw ng Bagong Taon makaraang paslangin ang mag-syota sa loob ng kanilang kotse sa likurang bahagi ng kapilya sa Richmond Subd. sa Barangay Bahay-Pare, Meycauayan City, Bulacan kahapon ng umaga.
Magkayakap pa nang matagpuan ang mga biktimang sina Jayson Hernandez 30, ng Barangay Marulas, Valenzuela City; at Catherine Esteban, 22, ng Barangay Tugatog sa bayang nabanggit.
Si Hernandez ay negosyante ng taxi habang si Esteban naman ay barangay kagawad ng kanilang lugar.
Ayon sa pulisya, ang dalawa ay natagpuan sa loob ng kulay silver na Mitsubishi Lancer na may plakang ZHM188 na nakaparada sa likuran ng kapilya bandang alas-6 ng umaga.
Kapwa may masking tape ang mukha na may tama ng bala sa ulo at iniwang nakaupo sa likurang bahagi ng nasabing kotse.
Ayon sa mga residente ng Richmond Subdivision, wala silang narinig na putok ng baril bago natagpuan ang dalawa.
May teorya ang pulisya na pinaslang ang dalawa sa ibang lugar at inabandona lamang sa nabanggit na barangay.
Isinaisantabi ng pulisya ang angulong pagnanakaw dahil sa walang nawalang mga mahahalagang gamit ng dalawa sa loob ng sasakyan.
Sinisilip naman ng mga imbestigador ng pulisya ang motibo na may kaugnayan sa negosyo, pulitika at love triangle.