PAMPANGA - Apat-katao kabilang ang dalawang kawal ng Philippine Army ang iniulat na nasawi habang dalawang iba pa ang nasugatan sa naganap na road mishap sa kahabaan ng Subic Clark-Tarlac Expressway na sakop ng Barangay Manuali sa bayan ng Porac, Pampanga noong Martes ng gabi.
Sa ulat ni P/Supt. Rolly Mendoza, hepe ng Porac PNP, kabilang sa mga nasawi ay kinilalang sina Pfc Mayolito Calaciad, Pfc Jayson Fajardo at ang mag-asawang Maria Teresita Escopete at Apolinario Bernabe.
Ginagamot naman sa St. Rafael Foundation and Medical Center sina Pfc Alex Franco at Private Lorenzo Gazzingan.
Ang mag-asawa ay sakay ng Mitsubishi Outlander na may plakang ZJK 610 na bumangga sa likurang bahagi ng trak ng mga sundalo ng Army’s 3rd Infantry Battalion na nakabase sa Balanga City, Bataan.
Napag-alamang pabalik na ang mga sundalo sa Balanga City mula sa himpilan ng Army’s 7th Infantry Division sa Fort Magsaysay sa Nueva Ecija nang maganap ang aksidente.
Sa lakas ng pagkakabangga ay nasawi rin sa trahedya ang mag-asawa matapos na sumalpok sa steel barrier ng expressway kung saan ang dalawang sasakyan ay bumaliktad. (Dino Balabo at Joy Cantos)