Sanggol dedo sa sunog

Malagim na kamatayan  ang sinapit ng isang sanggol na babae makaraang makulong sa nasusunog nilang tahanan sa Barangay New Katipunan sa bayan ng Matan-ao, Davao del Sur kamakalawa. Nagmistulang uling ang biktimang si Irene de Acosta, 4-buwang gulang at bunsong  anak ng magsasakang si  Diosdado de Acosta. Kasalukuyan namang ginagamot ang nakatatanda nitong kapatid  na si Dominic de Acosta, 2. Sa police report na nakarating sa Camp Crame, natutulog ang pamilya de Acosta nang ma­alimpungatan si Diosdado na nagliliyab na ang kanilang tirahan. Nagmamadaling lumabas ng kanilang tahanan ang mag-asawang de Acosta, gayon pa man sa sobrang pagka­taranta ay nakalimutan sa duyan ang sanggol at tanging si Dominic ang nailigtas. Sa inisyal na imbestigas­yon, natumbang lampara ang pinagmulan ng sunog. Joy Cantos

Eroplano bumagsak, piloto ligtas

Nakaligtas sa karit ni kamatayan ang isang piloto makara­ang bumagsak ang pinalilipad nitong eroplano sa  Tagum City, Davao del Norte kahapon ng umaga. Kinilala ni P/Supt. Dario Gunabe, ang nakaligtas na piloto na si Anselmo Pascual. Base sa ulat na nakarating sa Camp Crame, pinalilipad ni  Pascual  ang Cessna RPR 2756 aircraft sprayer na pag-aari ng Sumipro nang magloko ang makina bandang alas-6:30 ng umaga. Ang nasabing eroplano ay bumagsak may 50 metro ang layo sa runway park  ng Lemonsito Mankilam ng nasabing lungsod. Napag-alamang nawasak ang isang inabandonang bahay at hindi nasugatan ang pilotong si Pascual. Joy Cantos