CAMP VICENTE LIM, Laguna – Inilabas na ng mga awtoridad ang carthographic sketch ng nag-iisang suspek sa pagpatay kay Mabini Vice Mayor Rowell Sandoval sa Bauan Batangas noong Agosto 26. Ayon kay P/Supt. Antonio Malabanan, hepe ng Bauan, Batangas police, ang gunman na payat, nasa 25 hanggang 28-anyos, may taas na 5’3’’- 5’4’’. “Nailarawan ng isang tauhan ni vice mayor ang suspek dahil pumasok ito mismo sa loob ng call center saka isinagawa ang krimen,” ani Malabanan. Inamin naman ni Malabanan na nahihirapan pa sila sa pag-iimbestiga dahil kulang pa ang nakakalap na mga ebidensya para matukoy ang nasa likod at ang motibo ng pamamaslang. Sa tala ng pulisya, pinagbabaril si Vice Mayor Sandoval, 51, sa harap mismo ng kanyang asawang si Wilma habang nag-uusap sa loob ng kanilang two-story Research Solution Information Center (RSIC) call center building sa Buendia St. Poblacion 3. Pulitika at negosyo ang unang sinisilip ng mga awtoridad na posibleng motibo ng krimen. – Arnell Ozaeta