9 kawani ng DILG nadale ng bukas-kotse

CAMP VICENTE LIM, Laguna — Siyam na kawani ng De­partment of Interior and Local Government (DILG), ang na­pa­ulat na nadale ng grupong bukas-kotse sa ba­yan ng Carmona, Cavite ka­ma­kalawa ng hapon.

Kabilang sa mga biktima ng kawatan ay sina Abegail Nomi­nador, Arlene Perez, Sheryl Del­mundo, Alice Sanchez, Jennifer Tonlo, Jose Locquia­no, Christopher Lacson at si Gemma Gabriel na pawang nakatalaga sa DILG Action Monitoring Center sa National Headquarters Bldg sa Camp Crame, Quezon City.

Ayon kay P/Senior Ins­pector Jose­lito Sisante, hepe ng Car­mona police station, lulan ang mga biktima sa L-300 van (XHX-124) nang magpas­yang tumigil sa Paseo de Carmona Complex sa Ba­rangay Maduya para kumain bandang alas-4:50 ng hapon.

 Nabatid na papauwi na ang grupo mula sa outing nang magkasundong kumain sa sangay ng Jollibee sa na­turang complex na tumagal ng kala­hating oras.

Laking gulat na lang ng mga biktima nang bumalik sa van at nadiskubreng wala na ang kanilang mga bag na nag­lalaman ng personal na gamit, mga celfone at pera.

Ayon sa mga saksi, may pu­maradang kulay asul na van na walang plaka sa tabi ng van ng mga biktima na pinanini­wa­laang ginamit ng mga kawatan sa paghakot ng mga gamit sa kanilang pag­takas.

Nagsasagawa na ng im­bes­ti­gasyon ang mga awto­ri­dad para matukoy ang grupo ng kawatan. (Arnell Ozaeta)