Mag-iina kinatay ng adik na ama

CAMP VICETNE LIM, Laguna  – Malagim na kamata­yan ang sinapit ng isang 40-anyos na misis at dalawa nitong anak na paslit maka­raang pagtatagain ng sariling mister na pinaniniwalaang napraning dahil sa pagkalango sa droga sa Barangay Niugan, Cabuyao, Laguna kahapon ng madaling-araw. 

Kinilala ni P/Supt. Mark Edison Belarma, Region 4A-Criminal Investigation and Detection  Group (CIDG) chief, ang kinatay na mag-iina na si Susan Zamora at dalawang anak nitong  sina Rolando Jr., 4 at Rosana, 2, pawang resi­dente ng Block 30 Lot 2 South­ville ng nabanggit na bayan.

Pormal naman kakasuhan matapos na masakote ang sus­pek na si Rolando Zamora Sr., 39, na ngayon ay sumasa­ilalim sa imbestigasyon sa Cabuyao police station.

Ayon sa ulat, bandang alas-4 ng madaling-araw nang mabulabog ang mga kapit­bahay ng pamilya Zamora kung saan nagwala ang sus­pek at pagtatagain ang kan­yang sariling pamilya habang natutulog sa kanilang tahanan.

Tanging hiyawan at iyakan ng mag-iina habang pinag­tataga ng suspek ang narinig ng mga nagrespondeng lala­king kapitbahay kasama ang mga barangay tanod at nasu­kol ito ng mga operatiba ng pu­lisya na sumugod rin sa lugar ng krimen.

“Posibleng naburyong ang suspek dahil sa epekto ng droga at hindi pagtulog ng 48-oras, nagsasalita na hinahabol daw siya ng mga taong gus­tong pumatay sa kanya kaya niya  pinagtataga ang kanyang pamilya na inakala marahil na masamang espiritu,” pahayag ni Belarma sa PSN

“Nasira na ang ulo ng sus­pek kasi pangiti-ngiti pa s’ya habang iniimbestigahan sa police station na parang bale­wala sa kanya ang gina­wang brutal na krimen,” dag­dag pa ni Belarma. (Arnell Ozaeta, Joy Cantos at Ed Amoroso)