Prof na opisyal ng Bayan Muna, inutas

CAMP CRAME –Isang university professor na opisyal ng militanteng grupong Bayan Muna ang pinagbabaril hanggang sa mapatay sa harapan ng kanyang mga estudyante sa loob ng campus ng University of Eastern Philippines sa Catarman, Samar kamakalawa.

Kinilala ang biktima na si Tonyo Cruz, liaison officer ng Bayan Muna, dead-on-the-spot sa tinamong mga tama ng bala sa katawan.

Batay sa report ng pulisya, naganap ang krimen dakong alas-4:15 ng hapon sa harapan ng Engineering Building ng nasabing unibersidad.

Bigla na lamang umanong sumulpot sa lugar ang dalawang naka-motorsiklong kalalakihan at agad na pinagbabaril ang biktima na napuruhan sa leeg at ulo.

Matapos ang krimen ay parang walang anumang lumisan sa lugar ang mga salarin.

Sa inisyal na imbestigasyon, ang biktima ay kaibigan ni Bayan Muna Rep. Satur Ocampo na bago naging aktibo sa nasabing organisasyon ay nagsilbi ring secretary geneneral ng Karapatan-Eastern Samar.

Naitala na ika-123 sa mga opisyal at miyembro ng Bayan Muna ang biktima na pinaslang simula noong 2001 nang manungkulan sa puwesto si Pangulong Arroyo. (Joy Cantos)