Mister patay sa taga

CAMP SIMEON OLA , Legazpi City – Patay ang isang mister matapos na pagtatagain habang nakikipag-inuman sa isang tindahan kasama ang kanyang mga kaibigan sa Sitio Kaltihan, Brgy. Batog Paluway, San Andres, Catanduanes kamakalawa ng gabi.

Hindi na umabot pang buhay sa Catanduanes Provincial Hospital si Randy Saula, 33, magsasaka, tubong Calasansanan, Babaingan, Iloilo City at pansamantalang nakatira sa naturang lugar.

Isa sa dalawang suspek na sugatan na isinugod din sa naturang pagamutan ay kinilalang si Romy Solero, 31, biyudo, magsasaka at residente ng naturang lugar. Ang isa pang suspek na kaagad naman na nasakote ng mga awtoridad ay kinilalang si Jose Guiana 31, may asawa, magsasaka at residenteng naturang lugar.

Batay sa ulat, dakong alas-7:30 ng gabi habang ang biktima kasama ang ilang mga kaibigan nito ay nagiinuman sa sari-sari store na pag-aari ng isang kinilalang Elza Sadela sa nasabing lugar nang bigla na lamang salakayin ng mga suspek at walang habas na pinagtataga ng itak ang biktima. Nagawa pang makapanlaban ng biktima sanhi ng pagkakasugat ng isang suspek sanhi ng kanyang pagkakaaresto. (Ed Casulla)