Maglola minartilyo ng adik, patay

CAVITE – Brutal na kamatayan ang sinapit ng maglola makaraang martilyuhin ng hindi kilalang lalaki na pinaniniwalaang lango sa bawal na gamot sa naganap na bayolenteng krimen sa Purok 136, Barangay Niogan, Tagaytay City, Cavite kamakalawa ng umaga.

Bandang alas-11 ng umaga nang matagpuan ang duguang bangkay ng mga biktimang sina Crisanta Ferman y Gatpandan, 80, biyuda at Cristina Peji y Gatpandan, 14, estudyante at kapwa naninirahan sa Barangay Sambal, Tagaytay City.

Ayon kina SPO3 Leonardo Mojica at PO2 Leodines Mendoza, nadiskubre ang krimen matapos na magtungo si Emiteria Alvarez’ sa tahanan ng maglola upang ipaalam na sa kanilang bahay gaganapin ang pagrorosaryo.

Base sa pagsusuri ng pulisya, na minartilyo sa ulo ang maglola kaya halos madurog ang bao nila.

Napag-alaman din na nagbabantay ang maglola sa pag-aaring lupain sa nabanggit na barangay na posibleng kakilala ng mga biktima ang killer dahil hindi kumahol ang alagang aso.