6 maninikwat nalambat

CAMP HEN. ALEJO SANTOS, Bulacan – Anim na kalalakihan kabilang na ang isang Tsino na pinaniniwalaang sumikwat ng 500 sako ng asukal ang nalambat ng mga tauhan ng pulisya sa Barangay Iba, Meycauayan, Bulacan kahapon ng madaling-araw.

Kasalukuyang naghihimas ng rehas na bakal ang mga suspek na sina Pol Cu, Ernesto Cortel, Joel Yabut, Jayson Fuentes, Jorge Noble at Pol Cantomayor na pawang residente ng Quezon City at Karuhatan, Valenzuela City.

Tinutugis naman ang dalawang pang suspek na alyas Mike at Robert lulan ng Tamaraw FX NCS-926 sa hindi binanggit na pook.

Bukod sa 500 sako ng asukal na P.9 milyon ang narekober ay kinumpiska pa ang kotseng Mazda (WHH-187) na ginamit ng mga suspek bilang backup sa kanilang modus-operandi. Narekober din ang tatlong baril, granada, tatlong posas at mga maskara.

Napag-alaman pa sa ulat ng pulisya na bago makalayo ang mga suspek lulan ng cargo truck (WSY-205) na lulan ang kargamentong sinikwat ay nakatanggap ng impormasyon ang pulisya.

Agad na naglagay ng checkpoint ang pulisya sa posibleng pagdaanan ng cargo truck hanggang sa masabat ang mga suspek. (Ulat ni Efren Alcantara)