Sundalo natodas sa sariling baril

CAMP AGUINALDO – Isang tauhan ng Philippine Army ang kumpirmadong nasawi makaraang tamaan ng bala ng sariling baril na aksidenteng nahulog sa foxhole sa Culasi, Antique kamakalawa.

Tumama sa likurang bahagi ng katawan ni Pfc Romeo Aquirre, 27, bago naglagos sa dibdib ang bala ng M-14 Armalite rifle.

Base sa ulat na nakarating kahapon sa Camp Aguinaldo, bandang alas-11:45 ang umaga nang mag-inspeksyon ang biktima sa mga foxhole sa Sitio Moro-Boro, Barangay Naba sa bayan ng Culasi.

Sa hindi inaasahang pagkakataon ay bumagsak ang hawak nitong Armalite habang sumisilip sa foxhole at biglang umalingawngaw ang malakas na putok saka tumama sa katawan nito.

Idineklarang patay sa Culasi District Hospital ang biktimang residente ng Barangay Matias, Dingle, Iloilo. (Ulat ni Joy Cantos)