2 sundalo dedo, 1 pa grabe sa ambush

CAMP AGUINALDO – Dalawang sundalo kabilang ang isang batang opisyal ang nasawi habang isa pa ang nasugatan matapos na tambangan ng mga pinaghihinalaang rebeldeng New People’s Army (NPA) ang sinasakyang pick-up sa Canlaon City, Negros Oriental nitong Miyerkules.

Kinilala ang napaslang na opisyal na si 1Lt. Gelsson Regner habang patuloy namang inaalam ang pangalan ng isa pang nasawi nitong tauhan.

Batay sa report, naganap ang ambush bandang alas-2:45 ng hapon habang lulan ang mga miyembro ng Charlie Company ng 11th Infantry Battalion ng Philippine Army sa isang civilian pick-up at tinatahak ang kahabaan ng daan sa Barangay Budlasan sa nasabing siyudad.

Nabatid na bigla na lamang nagpaulan ng bala ang mga nakatagong rebeldeng NPA na nakaabang sa pagdating ng mga sundalo sa nasabing masukal na lugar.

Sa kabila naman ng dehado sa bilang at sa posisyon ay nagawa pa ring makipagpalitan ng putok ng mga sundalo laban sa umaatakeng grupo ng mga rebelde.

Pero, napuruhan pa rin ng tama ng bala ang dalawa sa mga sundalo habang isa pa ang nasugatan.

Napilitan namang tumakas ang mga rebelde matapos na maisagawa ang kanilang pakay.

Naglunsad na ng pursuit operations ang mga tauhan ng Army’s 11th Infantry Battalion para tugisin ang mga rebeldeng responsable sa pananambang. (Ulat ni Joy Cantos)