Guro patay sa sunog

CAMP OLIVAS, Pampanga — Isang 57-anyos na guro ng Orion Central Elementary School ang iniulat na nasawi makaraang masunog ang kanyang bahay at naabo ang may P.3-milyong ari-arian sa Brgy. Villa Angeles, Bataan kamakalawa.

Natagpuan ng pulisya ang bangkay ni Myrna A. Pangilinan, may asawa, sa harapan ng pintuan ng kanyang kuwarto na pinalalagay na nagpupumilit na lumabas ngunit nakulong dahil sa makapal na usok.

Napag-alaman sa inisyal na pagsisiyasat ng pulisya na nagsimulang kumalat ang apoy mula sa sumiklab na Christmas light sa bintana at pinalalagay na mag-isang natutulog ang biktima kaya walang sumaklolong kasambahay. (Ulat ni Erickson Lovino)