Lola ni-rape/slay ng adik

PULILAN, Bulacan — Pitong araw bago matagpuang naaagnas na bangkay ng isang 70-anyos na lola na pinaniniwalaang hinalay muna saka pinagsasaksak ng adik sa droga sa Brgy. Dampol 2 sa bayang ito kamakawala ng hapon.

Umalingasaw ang mabahong amoy kaya nadiskubre ang bangkay ni Juanita Manuel, biyuda ng nabanggit na barangay.

Sa isinumiteng ulat kay P/Supt. Ramon Bibit, hepe ng pulisya sa bayang ito, nagpaalam ang biktima sa kanyang mga anak na magtutungo lamang sa kamag-anakan sa Mandaluyong City at simula noon ay hindi na nakabalik pa sa bahay ang biyuda.

"Hindi magagawa ng matinong tao ang brutal na pagpatay sa matanda kundi isang adik sa droga," ani pa ni Bibit.

Ayon sa pulisya, nagsasaka ng palayan ang hindi kilalang magsasaka nang mamataan nito ang bangkay ng biktima dahil na rin sa masangsang na amoy.

Nakalilis pa ang pang-itaas na damit ng biktima na may palatandaang hinalay saka pinatay ng hindi kilalang lalaki na pinaniniwalaang adik sa droga. (Ulat ni Efren Alcantara)