Bahay sinuwag ng pick-up, 1 patay, 4 grabe

MAGALLANES, Cavite – Pinaniniwalaang nakatulog pansamantala ang drayber ng Isuzu pickup kaya sumalpok sa isang bahay na ikinasawi ng batang lalaki, samantala, apat pang iba ang nasa kritikal na kondisyon sa Barangay Cabulusan sa bayang ito kahapon ng madaling-araw.

Si Maximel Garcia, 10, grade 5 pupil ay namatay, samantala, ang kapamilya nito na isinugod sa Dr. Derayata Hospital ay sina Marcia Evilla, 31, ina ng nasawi; Cerillo Granado, 32; Goriesel Garcia,11 at Cesar Granado, 18 na pawang residente ng nabanggit na barangay.

Inaresto naman ang drayber ng sasakyan (CBJ-139) na si Anthony Hacienda, 21, binata ng Camp Vicente Lim, Calamba, Laguna.

Sa inisyal na pagsisiyasat ng pulisya, naitala ang aksidente bandang alas-2 ng madaling-araw makaraang makatulog at hindi kaagad nakabig ng drayber ang minamanehong pickup kaya lumusot sa bahay na kinatutulugan ng mga biktima. (Ulat ni Cristina Go-Timbang)