NAPOLCOM provincial director nilikida

CAMP CRAME – Pinagbabaril hanggang sa mapatay ang provincial director ng National Police Commission (NAPOLCOM) ng mga hindi kilalang armadong kalalakihan na pinaniniwalaang rebeldeng Moro Islamic Liberation Front (MILF) habang ang biktima ay nag-iigib ng tubig sa harap ng sariling bahay sa Barangay Kayaga, Buluan Maguindanao noong Sabado ng gabi.

Walang buhay na bumulagta ang biktimang si Mustapha Pembleken Sampulna, 42, may asawa ng Sitio Mamalinta ng naturang lugar.

Naganap ang krimen bandang alas-9:30 ng gabi sa harapan ng bahay ng biktima matapos mag-igib ng tubig sa poso.

Napag-alaman sa ulat na nakarating kahapon sa Camp Crame na kagagaling pa lamang ng biktima sa kasalan at nagpahinga saka nag-igib ng tubig ngunit sinalubong siya ng mga armadong kalalakihan.

Matapos na masigurong patay na ang biktima ay mabilis na lumayo ang mga killer sa hindi nabatid na direksyon.

Sinisilip ng mga imbestigador ang motibo na may pinalalagay na may kaugnayan ang krimen sa hinahawakan nitong mga kaso sa nabanggit na ahensya. (Ulat nina Danilo Garcia at Lordeth Bonilla)