5 rebelde patay sa engkuwentro

ZAMBOANGA CITY — Lima na rebelde ang iniulat na napatay sa panibagong engkuwentro ng tropa ng militar laban sa pinagsanib na puwersa ng mga rebeldeng Moro Islamic Liberation Front, Abu Sayyaf at New People’s Army (NPA), kahapon sa kagubatan at bulubundukin ng Sultan Gumander, Lanao del Sur.

Sa ulat ni Major General Alfonso Dagudag, commander ng 4th Division ng Phil. Army kay Lt. General Narciso Abaya, hepe ng Armed Forces Southern Command, naitala ang panibagong sagupaan bandang alas-6:30 ng umaga sa Sitio Maladig.

Siyam na rebelde ang naitalang napapatay na ng tropa ng militar at hindi mabatid na bilang ng nasugatan simula noong Sabado.

Narekober ng tropa ng 67th Infantry Battalion ang limang malalakas na baril, samantala, ang mga sugatang rebelde ay binitbit ng kanilang papatakas na mga kasamahan habang ipinagpapatuloy ang pagtugis ng militar sa tatlong grupo ng rebelde.

Ayon sa ulat ng militar, ilang kasapi ng teroristang Abu Sayyaf ay kasalukuyang nangangalap ng bala upang suportahan ang kanilang grupo sa Sulu at Basilan partikular na ang pagsasanay ng rebeldeng Moro Islamic Liberation Front (MILF). (Ulat ni Roel Pareño)