Muling pagpapasabog sa Zamboanga napigilan

ZAMBOANGA CITY – Napigilan ng militar ang muling pagpapasabog sa Zamboanga City ng mga teroristang Abu Sayyaf makaraang madiskubre ang isang pakete ng improvised bomb na inilagay sa market stall malapit sa shrine ng Virgin Mary sa Fort Pilar noong Biyernes ng gabi.

Ang pagkakadiskubre sa nabulilyasong pagpapasabog ay itinaon sa dumadagsang libu-libong deboto sa naturang lugar upang idaos ang kapistahan ng Virgin of Pilar kahapon.

Napag-alaman sa ulat na ang bomba ay nadiskubre ng hindi kilalang stall owner at kaagad naman ipinagbigay-alam sa pulisya bandang alas-8:45 ng gabi.

Sinabi ni P/Chief Insp. Jose Bayani Gucela, hepe ng Explosive Ordinance Disposal (EOD) na ang bomba ay may timing device at pitong minuto na lamang ang nalalabi at sasabog na bago ma-defused.

Ayon sa mga awtoridad ang nadiskubreng bomba ay kaparehas ng bomba na sumabog sa videoke bar sa Malagutay na ikinasawi ng apat katao kabilang na ang sundalong Kano.

Ibinulgar ng militar na dalawang teroristang Abu Sayyaf na pinaniniwalaang nagsanay na gumawa ng bomba ang kasalukuyang tinutugis sa hindi binanggit na lugar upang hindi maantala ang pagdakip. (Ulat ni Roel Pareño)