Motorsiklo nahulog sa bangin, driver patay,1 sugatan

MENDEZ, Cavite – Isang driber ang iniulat na nasawi habang isa pang batang lalaki ang malubhang nasugatan makaraang mahulog sa bangin ang sinasakyan motorsiklo sa kahabaan ng Mendez, Alfonso road, Brgy. Anuling Cerca 1 ng bayang ito kamakalawa.

Kinilala ng pulisya ang nasawing biktima na si Ricardo Dimaranan, 28, binata ng Brgy. Asis 1 ng bayang ito habang ang isa pang grabeng nasugatan ay nakilalang si Ernie Arabe, 9, ng Brgy. Palocpoc ng nabanggit na bayan.

Lumalabas sa pagsisiyasat ng pulisya, naganap ang aksidente dakong alas-10 ng gabi makaraang mawalan ng kontrol ang minamanehong motorsiklo (VE-7631) ni Dimaranan kaya nagtuluy-tuloy ito sa bangin. (Ulat ni Cristina Go-Timbang )