3 pekeng reporter timbog

CAMP VICENTE LIM, Laguna – Tatlong pekeng police reporter ang dinakip ng mga kagawad ng Mendez PNP makaraang magpanggap na mga pulis at mangikil sa tatlong residente ng Brgy. Anuling Cerca 2, Imus, Cavite, kahapon.

Kinilala ni SPO2 Rodolfo Erni ang mga suspek na sina Allan Castro ng Muntinlupa City; Marlon Reyes ng Brgy. San Vicente, San Pedro, Laguna at Arnulfo Alas ng Sto. Niño, San Pedro, Laguna.

Habang ang tatlong nagreklamo sa pulisya na nakaligtas sa pangongotong ng mga suspek ay kinilalang sina Roberto Erni, Fidelito Belamide at Cezar Jose na pawang mga residente ng naturang lugar.

Nadakip ang mga suspek dakong ala-1 ng hapon matapos na mamataan ng mga nagpapatrulyang PNP mobile patrol car ang mga suspek na sapilitang binebentahan ang mga biktima ng raffle ticket sa halagang P2,000. (Ulat ni Ed Amoroso)