Vice-mayoralty bet ibinuwis ang buhay sa mga pasahero

SIBALE, Romblon – Isang 61 anyos na ginang at Vice-Mayoralty bet ng partidong LDP ang maituturing na bayani matapos nitong ibuwis ang sariling buhay sa pagsagip sa 28 pasahero ng lumubog na bangka sa gitna ng karagatan ng Tablas Island, Romblon kamakailan.

Sa naging salaysay ng isa sa mga survivor ng lumubog na M/V Sea Gold na si Merwin Fradejas,19, nang lumubog ang nasabing bangka noong Lunes ng umaga matapos salpukin ng malakas na alon sila ay isa-isang sinagip ni Norma Fabunan.

Hindi inintindi ni Fabunan ang sarili hanggat hindi nito nasasagip ang 28 pasahero hanggang sa tuluyan na itong lumubog.

Sa kasalukuyan ay 15 pasahero ang nawawala na pinangangambahang kinain ng mga pating sa laot. (Ulat ni Meriel Doronia)