Marcos: Nagpatakas kay Alice Guo mananagot

MANILA, Philippines — “There are no sacred cows.”

Ito ang tiniyak kahapon ni Pa­ngulong Ferdinand Marcos Jr. sa ginagawang imbestigasyon ng Department of Justice (DOJ) kaugnay sa pagtakas sa bansa ng sinibak na si Bamban, Tarlac Mayor Alice Guo.

Sinabi ng Pangulo na nakausap na niya si Justice Secretary Jesus Crispin Remulla para bigyan ng update sa resulta ng imbestigasyon.

Halos tapos na rin aniya ang DOJ sa malalim na imbestigasyon at kanilang kikilalanin ang mga sangkot sa pagpapatakas kay Guo at kaaagad silang aaksyon dito.

Aminado si Marcos na itinago sa kanya ng Bureau of Immigration (BI) na nakatakas na ng bansa si Guo at tiniyak na may masisibak na mga opisyal ng BI dahil mayroon na silang ideya sa mga taong sangkot dito.

 “Well let’s not… That’s the last part of this, how far, how deep does this go. Isa lang ba ang tao na involved, o marami sila, o sindikato ito, that’s what we are doing,” pahayag ni Pangulong Marcos.

Idinagdag ng Pangulo na walang puwang sa gobyerno ang sinumang inuuna ang personal na interes kaysa sa pagli­lingkod sa sambayanang Pilipino nang may dangal, integridad at katarungan.

Matatandaan na sinabi ni Senador Risa Hontiveros na nagtungo sa Kuala Lumpur, Malaysia si Guo at pagkatapos ay nagtungo sa Singapore at ngayon ay nasa Indonesia na.