DOJ kakasuhan ang tumulong kay Guo na makaalis ng Pinas
![DOJ kakasuhan ang tumulong kay Guo na makaalis ng Pinas](https://media.philstar.com/photos/2024/08/20/alice-guo_2024-08-20_21-02-00.jpg)
MANILA, Philippines — Nakatakdang kasuhan ng Department of Justice ang sinuman na responsable para makaalis ng bansa ang pinatalsik na si Bamban, Tarlac Mayor Alice Guo.
Ito ang tiniyak ni DOJ spokesman Atty. Mico Clavano na papanagutin ng kagawaran ang sinuman na responsable para makaalis ang kontrobersyal na dating alkalde.
Hindi ito aniya isang simpleng usapin na maaring ipagkibit-balikat lamang.
“This is a case of national significance. Thus if it is indeed true that Alice Guo has left the country, a thorough investigation is needed to hold those responsible accountable. This is not a light matter,” ani Clavano.
Nitong Hunyo, isinailalim si Guo sa Immigration Lookout Bulletin Order (ILBO) kung saan inaatasan ang lahat ng immigration officers na ialerto ang otoridad sakaling magtangkang umalis ng bansa si Guo.
Kinumpirma naman ni Presidential Anti-Organized Crime Commission spokesperson Dr. Winston Casio na nakaalis na si Guo sa Pilipinas at tatlong bansa sa Southeast Asia ang napuntahan nito kung saan ang pinakahuli ay sa Indonesia.
Dumating si Guo sa Kuala Lumpur, Malaysia noong July 18 mula Denpasar, Indonesia via Batik Air 177. Nakarating sa Singapore mula Kuala Lumpur via Jetstar Asia 686 nitong July 21 at August 18 ay nakarating sa Batham, Indonesia mula Singapore sa pamamagitan ng ferry boat.
- Latest