Lambda variant pasok na sa Pinas
MANILA, Philippines — Kinumpirma kahapon ng Department of Health (DOH) na nakapagtala na ang Pilipinas ng unang kaso ng COVID-19 Lambda variant.
Sa ulat ng DOH, University of the Philippines - Philippine Genome Center (UP-PGC), at ng University of the Philippines - National Institutes of Health (UP-NIH) , lumilitaw na ang unang kaso ng Lambda variant ay natukoy sa pinakahuling genome sequencing na isinagawa nila.
Ayon sa DOH, ang pasyente na dinapuan ng nasabing variant ay isang 35-anyos na babae na bina-validate pa kung local case o returning overseas Filipino (ROF).
Ang pasyente ay asymptomatic at nakarekober na matapos sumailalim sa 10-day isolation period.
Anang DOH, kasalukuyan na silang nagsasagawa ng back tracing at case investigation hinggil dito.
Ang Lambda variant ng COVID-19 ay unang natukoy sa Peru noong Agosto 2020.
Ito ay klasipikado bilang Variant of Interest (VOI) ng World Health Organization (WHO) noong Hunyo 14, 2021.
Anang DOH, ang naturang VOI ay may potensiyal na makaapekto sa transmissibility ng SARS-CoV-2 at kasalukuyang minu-monitor para sa posibleng clinical significance nito. -
- Latest
