Sen. Go, tiniyak ang dagdag na suweldo sa mga nurse

MANILA, Philippines — Mabibigyan ng dagdag na suweldo at iba pang benepisyo ang mga nurse sa bansa.

Ito ang tiniyak ni Senator Christopher Lawrence “Bong” Go, na siyang Chairman ng Senate na Committee on Health ay nagsabing, patuloy niyang gagawing prayoridad ang kapakanan ng mga nurse sa bansa upang hindi na nila maisipang magtrabaho pa sa abroad.

“Malaki ang diperensiya ng suweldo sa abroad at dito, pero nais kong dito na kayo magtrabaho para hindi kayo malayo sa mga pamilya ninyo,” anang senador.

Sinabi ng mambabatas mula sa Davao City, idinepensa niya ang budget increase para sa Department of Health (DOH) sa ginawang budget deliberations upang matiyak ang kalidad at accessible na healthcare para sa lahat ng Pinoy, at bantayan ang kapakanan ng mga health workers, kabilang ang mga nurses. 

Idinagdag pa ni Go na ang ilan sa mga panukala na inihain niya ay tiyak na makatutulong sa mga nurses sa kanilang professional development at protektahan ang kalusugan ng mga ina at kanilang mga anak.