Lumabag sa Comelec gun ban umakyat na sa 507 - PNP

MANILA, Philippines – Umakyat na sa 507-katao ang naaresto ng pulisya matapos lumabag sa Comelec gun ban.

Sa ulat ni  P/Chief Supt. Wilben Mayor, tagapagsalita ng PNP, simula alas-8  ng umaga kahapon, umabot na sa 507 personalidad, karamihan ay sibilyan, ang naaresto dahil sa pagdadala ng baril matapos ipatupad ang Comelec gun ban noong Enero 10, 2016 at magtatapos sa Hunyo 8, 2016

Sa nasabing bilang, 490 ang mga sibilyan, dalawa ang pulis, apat ang opisyal ng pamahalaan,  anim ang security guard, apat ang kawani ng law enforcement agency, at dalawa ang miyembro ng Civilian Armed Forces Geographical Unit (Cafgu).

Samantala, nakakumpiska ang PNP ng 304 armas, 3,028 deadly weapons, 14 granada, pitong pampasabog, 12 replika ng baril, at 2,995  bala.

Ang gun ban ay ipinapatupad ng PNP at iba pang law enforcement agencies alinsunod sa magaganap na national at local elections sa May 9 sa bansa.

Tiniyak din ng PNP na mananatiling vigilante ang kanilang puwersa gayundin ang security operations para matiyak na tahimik ang magaganap na halalan.