Walang pambayad sa ilaw, tubig at upa ng bahay, nagbigti

MANILA, Philippines - Dahil sa walang pera na pambayad sa upa ng kanyang bahay, ilaw at tubig ay tinapos ng isang lalaki ang kanyang buhay sa pamamagitan nang pagbibigti sa loob ng kanyang bahay kamakalawa sa Valenzuela City.

Ang nasawi ay kinilalang si Jimson Barruga, 31, residente ng De Galicia St., Brgy. Maysan sa nasabing lungsod.

Batay sa ulat ng pulisya, alas-4:50 ng hapon nang makita ang biktima na nakabigti ng nylon cord at nakaluhod sa loob ng kanilang bahay ng live-in partner nitong si Annalyn.

Humingi ng tulong si Annalyn sa kapitbahay at pinagtulungan kalasin ang nylon cord sa leeg ng biktima at dinala sa Valenzuela General Hospital, subalit idineklara itong dead on arrival.

Ayon kay Annalyn, bago ang pagpapakamatay ng biktima ay laging mainit ang ulo nito dahil sa problema sa mga bayarin.