31 na sangkot sa smuggling ng bigas kinasuhan

MANILA, Philippines - Kasong smuggling ang  isinampa ng Bureau of Customs (BOC) sa Department of Justice (DOJ) laban sa 31 katao na  sangkot sa pagpupuslit ng libu-libong sako ng bigas sa pamamagitan ng Port of Legazpi City sa Bicol Region.

Ito ang inihayag ni Customs Commis­sioner Ruffy Biazon  na siyang nanguna sa pagsampa ng kaso sa 31 opisyal ng Kapatirang Takusa Multi Purpose Cooperative, Ugnayang Magbubukid ng San Isidro Cooperative, Malam Pampang Concern Citizen Multipurpose Coop at Samahang Magsasaka Kapampangan at Katagalugan Multipurpose Coop,  na nakabase sa apat na lugar ng Central Luzon tulad ng Bulacan at Pampanga na mga consignee ng 78,000 sako ng bigas mula sa Vietnam na nagkakahalaga ng  P93,600,000.

Batay sa ulat, ang nabanggit na kontra­bando ay dumaong sa Bicol port  noong Setyembre 2, 2012 ng walang sapat na dokumento gaya ng import permit na isang paglabag sa Sections 101 at  3601 ng  Tariffs and Customs Code of the Philippines (TCCP) at lampas din sa quota ng rice importation ang ginawa ng apat na kooperatiba.

Gayunman sinabi ni Biazon na ka­nilang suportado ang layunin ng mga kooperatiba, subalit kailangan pa ring pairalin ang  regulasyon ng  kawanihan.