Yulo hahataw ng gold sa horizontal

MANILA, Philippines —  Humirit pa si Karl Eldrew Yulo ng tiket sa final round ng horizontal bar sa Osijek Leg ng FIG Artistic Gymnastics World Cup Series na ginaganap sa Gradski VRT Hall sa Osijek, Croatia.

Muling ipinamalas ni Yulo ang mahusay na performance nito matapos magrehistro ng 13.733 puntos mula sa 4.900 difficulty at 8.733 execution.

Tumapos si Yulo sa ikapitong puwesto upang makasiguro ng silya sa eight-man final round.

Nanguna sa qualifying round si Camilo Vera ng Colombia na nagsumite ng 14.433 puntos habang pumangalawa naman si Tang Chia-Hung ng Chinese-Taipei na may 14.433 puntos.

Pasok din sa final round sina Angel Barajas ng Colombia (14.33), Milad Karimi ng Kazakhstan (14.200), Joe Fraser ng Great Britain (13.833), Luciano Letelier ng Chile (13.766) at Marios Georgiou ng Cyprus (13.633).

Nakatakda ang final round ng horizontal bar ngayong gabi.

“Driven by powerful and breathtaking giants, Eldrew Yulo successfully swung his way into the Horizontal Bar Final. Eldrew clinched his spot in the medal round despite a formidable field of Horizontal Bar specialists,” ayon sa post ng Gymnastics Association of the Philippines sa social media.

Nauna nang nakapasok sa finals si Yulo sa men’s floor exercise kung saan kumana ito ng 14.200 puntos mula sa 5.300 difficulty at 8.800 execution.

Gaganapin ang finals ng floor exercise Sabado ng gabi.