Alas Pilipinas players ‘di pa lalaro sa PVL
MANILA, Philippines — Patuloy na hindi maglalaro ang mga Alas Pilipinas players para sa kanilang mga Premier Volleyball League (PVL) mother teams sa kabuuan ng 2024 Reinforced Conference.
Maaari rin itong magtagal hanggang sa two-week Invitational Conference sa Setyembre.
Pinaghahandaan ng mga Pinay spikers ang 33rd Southeast Asian (SEA) Games sa Thailand sa Disyembre ng 2025.
“Technically, they’ll be released by September 15. But by then, the season will be over, so their next appearance in the PVL will likely be in the All-Filipino Conference, which I think will start by November,” ani Philippine National Volleyball Federation (PNVF) national team chairman Ricky Palau.
Ang mga Alas Pilipinas members na hindi naglalaro sa kanilang mga PVL teams ay sina Sisi Rondina at Cherry Nunag ng Choco Mucho, Eya Laure at Jen Nierva ng Chery Tiggo at Jema Galanza ng Creamline.
Ang iba pang mga miyembro ng national team ay sina Fifi Sharma at Faith Nisperos ng Akari, Dawn Catindig at Vanie Gandler ng Cignal HD at Dell Palomata ng PLDT.
Nasa tropa rin sina Thea Gagate ng ZUS Coffee at Julia Coronel ng Galeries Tower.
Si Gagate ang No. 1 overall pick ng kauna-unahang PVL Rookie Draft, habang No. 3 selection si Coronel.
Unang isinabak ang mga Pinay spikers sa 2024 AVC Challenge Cup for Women noong Mayo sa Rizal Memorial Coliseum.
Inangkin ng koponan ni Brazilian coach Jorge De Brito ang kauna-unahang bronze medal ng bansa sa nasabing torneo.
Samantala, muling pumirma ng kontrata si Alas Pilipinas team captain at setter Jia De Guzman sa Denso Airybees sa Japan V.League Division I.
- Latest