Davison-less PLDT nakapag-adjust

MANILA, Philippines — Bagama’t hindi nagla­laro si Fil-Canadian Savi Davison ay nagawa pa rin ng PLDT Home Fibr na sumosyo sa liderato sa Pool A ng 2024 Premier Volleyball League (PVL) Reinforced Conference.

Unang tinalo ng High Speed Hitters ang Creamline Cool Smashers, 16-25, 25-22, 24-26, 25-19, 15-12, bago isinunod ang Galeries Tower Highrisers, 25-19, 25-16, 25-17, noong Sabado para sa 2-0 record.

Katabla ng tropa ni coach Rald Ricafort sa liderato ang Chery Tiggo.

Sina long-time players Mika Reyes, Fiola Ceballos at team captain Kath Arado ang naging sandigan ng PLDT sa pagkawala ni Davison.

Sa panalo sa Galeries Tower ay nagtala si Arado ng 16 excellent digs at siyam na excellent receptions.

“Given na matagal na kaming magkasama nila ate Fiola (Ceballos), iyong mga iba, tapos late lang naman sila Savi (Davison), hindi siya masyado malaking adjustment kasi magkakasama kami and iisang sistema lang naman ina-adapt namin which is iyong kila coach Rald (Ricafort),” ani Arado.

Kasalukuyang nagpapagaling si Davison, ang naging leading scorer sa nakaraang 2024 PVL All-Filipino Conference, ng kanyang left knee injury.

“I’ll only be out maybe 3-4 weeks, so they’re just letting me have this conference to just, you know, take my time and come back in October a hundred percent,” wika ng Fil-Canadian striker.

Sinasandalan din ng High Speed Hitters si Russian import Elena Samoilenko na humataw ng 34 points laban sa Cool Smashers at 14 markers kontra sa Highrisers.

Sunod na lalabanan ng PLDT ang Farm Fresh sa Huwebes hangad maitayo ang 3-0 kartada.