Gilas susubukan ang Poland

MANILA, Philippines — Sasabak sa huling tune-up game ang Gilas Pilipinas kontra sa Poland bago tumungo sa Riga, Latvia para sa pagsisimula ng 2024 FIBA Olympic Qualifying Tournament sa Hulyo 2 hanggang 7.

Aarangkada ang duwelo sa alas-12 ng madaling araw (Manila time) para sa ikatlong friendly match ng Gilas bilang preparasyon nila sa OQT na siyang huling daan papasok sa Paris Olympics sa susunod na buwan.

Naunang tinalo ng Gilas, world No. 37, ang Taiwan Mustangs sa Pilipinas subalit kinapos kontra sa world No. 24 Turkey sa Istanbul, 84-73.

Kontra sa world No. 15 Poland, lalong makikilatis ang mga bataan ni coach Tim Cone lalo’t babanderahan ito ng NBA player na si Jeremy Sochan ng San Antonio Spurs.

Limitado lang ang na­ging aksyon ni Sochan sa 88-59 panalo ng Poland kontra sa New Zealand subalit naglista pa rin ng 7 puntos, 2 rebounds at 4 assists sa 18 minuto.

Tulad ng Gilas ay naghahanda rin ang Poland sa sarili nitong kampanya sa OQT na gaganapin naman Valencia, Spain tampok ang Lebanon, Angola, host Spain, Finland at Bahamas.

Ang Gilas ay mapapalaban kontra sa Georgia at host Latvia muna sa Group A bago ang crossover sa Group tampok ang Brazil, Cameroon at Montenegro.

Inaasahang babandera uli sa Gilas si Justin Brownlee na bumida sa laban nila kontra sa Turkey sa inilistang 21 puntos gayundin si June Mar Fajardo na humakot ng 17 puntos at 10 rebounds.

Aabangan naman ang bawi nina Dwight Ramos, Kai Sotto, Carl Tamayo, Chris Newsome, Calvin Oftana, Japeth Aguilar, Kevin Quiambao, Mason Amos at CJ Perez para sa 11-man Gilas team.

Onse lang ang dinala ni Cone para sa OQT dahil sa back injury ng starting point guard na si Scottie Thompson.