Galanza dagdag puwersa sa Alas

MANILA, Philippines — Ang eksperyensa ni Jema Galanza ang isa sa mga sasandigan ng Alas Pilipinas Women sa pagsagupa sa Vietnam sa knockout match ng 2024 FIVB Volleyball Women’s Challenger Cup.

Ito ang sinabi ni team captain Jia De Guzman kay Galanza na pinakahu­ling idinagdag sa tropa ni Brazilian coach Jorge Edson Souza de Brito kasama sina UAAP champions Bella Belen at Alyssa Solomon ng National University Lady Bulldogs.

“Grabe rin iyong experience niya all throughout these years. So malaking bagay na nandito siya sa loob ng team,” wika ng 29-anyos na si De Guzman sa 27-anyos na Creamline star.

Huling nagsama sina De Guzman at Galanza sa Creamline sa 2023 PVL Invitational Conference kung saan sila natalo sa finals sa Japanese team Kurashiki Ablaze.

Matapos ito ay naglaro si De Guzman para sa Denso Airybees sa Japan V. League bago bumalik sa bansa para giyahan ang Alas Pilipinas sa makasaysayang bronze medal sa 2024 AVC Challenge Cup for Women.

Dadalhin ng dating A­damson Lady Falcons ang kanyang eksper­yensa sa national team na lalabanan ang Vietnam sa knockout game ng 2024 FIVB Volleyball Women’s Challenger Cup sa Hulyo 5 sa Ninoy Aquino Stadium sa Malate, Manila.

Maliban kina De Guzman, Galanza, Belen at Solomon, ang iba pang nasa Alas Pilipinas pool ay sina Eya Laure, Sisi Rondina, Angel Canino, Thea Gagate, Fifi Sharma, Faith Nisperos, Vanie Gandler, Dawn Macandili-Catindig, Julia Coronel, Jen Nierva, Dell Palomata, Cherry Nunag at Arah Panique.