Fil-Am Brown kampeon sa Canada

MANILA, Philippines — Mas lalong tumibay ang pag-asa ni Filipino-American hurdler Robyn Brown na makahirit ng tiket sa Paris Games nang angkinin nito ang ginto sa Canada tournament.

Namayagpag si Brown sa women’s 400m hurdles sa Royal City Inferno Track and Field Festival na ginanap sa Alumni Stadium sa Guelph, Canada.

Naglista si Brown ng 57.15 segundo para masiguro ang gintong medalya.

Pinataob ni Brown ang Canadian bets na sina Marie-Frederique Poulin na may 58.07 para magkasya sa pilak at Reyne Rodrigues na may 58.94 na umangkin sa tanso.

Kasalukuyang nasa ika-40 puwesto si Brown sa Olympic qualifying rankings sa kaniyang event.

Kailangan ni Brown na mapanatili ang puwesto nito hanggang sa Hunyo 30 upang makapasok sa paris Olympics.

Nasa kontensiyon din ang isa pang Fil-Am hurdler na si Lauren Hoffman na kasalukuyan namang nasa ika-32 posisyon sa women’s 400m hurdles rankings.

May hanggang Hunyo 30 pa sina Brown at Hoffman para maabot ang Olympic standard time na 54.85 segundo para awtomatikong makapasok sa Paris Games.

Isa pa lang ang nakasisiguro ng tiket sa athletics sa Paris Olympics sa ngalan ni Tokyo Olympics veteran EJ Obiena sa men’s pole vault.

Naghahabol din na makapasok sa paris Games sina Southeast Asian Games champions Kristina Knott at Eric Cray, at sina John Tolentino at Janry Ubas.