George, Leonard umiskor ng 57 pts vs Pistons
LOS ANGELES — Umiskor si Paul George ng 33 points habang may 24 markers si Kawhi Leonard para pangunahan ang Clippers sa 112-106 paggupo sa Detroit Pistons.
Hinugot ni George ang 15 points sa fourth period tampok ang back-to-back three-pointers na nagsindi sa kanilang 11-0 atake at nagbigay sa Los Angeles (35-16) ng 107-94 abante sa Detroit (8-44).
Nag-ambag si James Harden ng 14 points, 8 assists at 6 rebounds para sa Clippers na pinigil ang hangad na ikatlong sunod na ratsada ng Pistons.
Naglista si Jaden Ivey ng 23 points para sa Detroit habang nagdagdag si Cade Cunningham ng 22 markers.
Sa Dallas, kumamada si Luka Doncic ng 32 points para igiya ang Mavericks (30-23) sa 146-111 pagdomina sa Oklahoma City Thunder (35-17).
Sa San Francisco, isinalpak ni Stephen Curry ang isang triple sa huling 0.7 segundo para sa 113-112 pagtakas ng Golden State Warriors (25-25) sa Phoenix Suns (31-22).
Sa Toronto, nagtala si Jarrett Allen ng 18 points at 15 rebounds para sa 119-95 panalo ng Cleveland Cavaliers (35-16) sa Raptors (19-34).
- Latest
