CSB, UST bakbakan sa huling semis berth

MANILA, Philippines — Okupado na ang tatlong silya sa Final Four.

Kaya naman matinding bakbakan ang masisilayan sa pagitan ng College of Saint Benilde at University of Santo Tomas para sa huling puwesto sa semis sa Shakey’s Super League (SSL) Collegiate Pre-Season Championship.

Nakasisiguro na ng semis spots ang defending champion National University, Adamson University at Far Eastern University matapos pataubin ang kani-kanyang karibal sa quarterfinals.

Walang sinayang na sandali ang Lady Bulldogs nang ilampaso nito ang University of the East sa pamamagitan ng 25-19, 25-21, 25-23 demolisyon.

Mabilis din na dinispatsa ng Lady Falcons ang Arellano University, 25-21, 25-18, 25-15, upang upuan ang kanilang silya sa Final Four.

Sa kabilang banda, namayani naman ang Far Eastern University sa A­teneo de Manila University sa bisa ng 25-19, 25-18, 25-18 panalo.

Magtutuos ang Lady Bulldogs at Lady Falcons sa semis habang titipanin naman ng Lady Tamaraws ang mananalo sa pagitan ng Lady Blazers at Golden Tigresses.

Nakatakda ang do-or-die quarterfinal match ng Benilde at UST sa Sabado sa Rizal Memorial Coliseum sa Vito Cruz, Manila para paglabanan ang huling tiket sa semis.

Humirit ng rubber match ang Lady Blazers nang paamuhin nito ang Golden Tigresses sa iskor na 25-22, 23-25, 18-25, 25-23, 15-11.