Lady Pirates binomba ng Chiefs
MANILA, Philippines — Napatumba ng Arellano University ang Lyceum of the Philippines University sa pamamagitan ng 25-22, 17-25, 25-21, 25-17 panalo kahapon sa 2023 Shakey’s Super League (SSL) Collegiate Pre-Season Championship Season 2 sa Filoil EcoOil Centre sa San Juan City.
Kumuha ng lakas ang Lady Chiefs kay Laika Tudlasan na nagpasabog ng 19 puntos mula sa 17 attacks at dalawang aces para dalhin ang kanilang tropa sa ikalawang panalo.
Tinapos ng Arellano ang eliminasyon tangan ang 2-1 rekord sa Pool B. Una nang tinalo ng Lady Chiefs ang San Beda University sa iskor na 25-16, 25-21, 25-21.
Lumasap lamang ng kabiguan ang Lady Chiefs sa Adamson University sa kanilang ikalawang laro sa iskor na 19-25, 17-25, 22-25.
Importante ang panalong ito para sa Lady Chiefs upang mapatatag ang pag-asa nitong maka-usad sa second round.
Nakakuha si Tudlasan ng solidong suporta mula kay Marianne Padillion na kumana ng 14 puntos.
“Sobrang halaga po ng laban namin na ito kasi kung natalo kami, baka mawalan po kami ng chance sa Top 2. Nanalo po kami at ngayon may pag-asang makapasok sa Top 2 at ma-extend pa ang laban namin sa Shakey’s,” ani Paralejas.
Sunod na makakasagupa ng Lyceum ang Adamson ngayon.
- Latest
