Tapales bagong world champion

MANILA, Philippines — Nadagdagan ang world champion ng Pilipinas matapos masungkit ni Marlon Tapales ang World Boxing Association (WBA) at International Boxing Federation (IBF) super bantamweight crowns.

Nagawa ito ni Tapales nang itarak nito ang split decision win laban kay Murodjon Akhmadaliev ng Uzbekistan upang maagaw ang dalawang korona kahapon sa Boeing Center Tech Port sa San Antonio, Texas.

Pumanig kay Tapales ang dalawang hurado matapos parehong nagbigay ng 115-113 habang nakuha ni Akhmadaliev ang boto ng isang hurado na may 118-110 puntos na inirehistro.

Umangat ang rekord ni Tapales sa 37 panalo at tatlong talo tampok ang 19 knockouts.

Malaki ang pasasalamat ni Tapales dahil nagbunga ang ilang buwan na pagsisikap nito sa training.

“I feel good. I feel happy for my team, for my manager and sir Sean Gibbons. I prepared really well for this fight but I was still shocked when I stopped him that early,” ani Tapales.

Makailang ulit na naantala ang laban.

Subalit hindi natinag ang Tubod, Lanao del Norte pride dahil tuluy-tuloy pa rin ang ensayo nito para masigurong handang-handa ito sa laban.

Kaya naman naging maganda ang resulta at mapasama sa listahan ng mga world champions.

Maagang naglunsad ng kaliwa’t kanang kumbinasyon si Tapales dahilan para agad nitong magulantang si Akhmadaliev.

Nagpatuloy ang matikas na kamada ni Tapales sa mga sumunod na rounds.

Sinubukan ni Akhmadaliev na makabalik sa porma subalit hindi ito sapat para tuluyang mahubaran ng korona.

Lumasap ang Uzbekis­tan fighter ng unang kabiguan para malaglag sa 11-1 marka.

Sa pagiging unified WBA at IBF super bantamweight champion ni Tapales, dalawa na ulit ang kasalukuyang world champion sa Pilipinas.

Kasama nito si Melvin Jerusalem na reig­ning WBO mini-flyweight titlist.