Ika-2 sunod na panalo tinuhog ng Red Warriors
MANILA, Philippines — Tinuhog ng University of the East ang kanilang ikalawang sunod na panalo matapos gibain ang University of Santo Tomas, 78-68, sa UAAP Season 85 men’s basketball tournament kahapon sa MOA Arena sa Pasay City.
Humataw si Luis Villegas ng 17 points, 13 rebounds, 6 assists at 3 steals para akayin ang Red Warriors sa pagpoposte ng 3-2 record.
Tumapos din si Nikko Paranada na may 17 markers para sa kanilang unang panalo sa UST, may 1-4 baraha ngayon, sapul noong Oktubre 7, 2017 sa UAAP Season 80.
“Hindi ako makapaniwala eh,” sabi ni UE coach Jack Santiago sa pagdaig nila sa UST. “I want to congratulate all my boys. It’s really a team effort.”
Matapos kunin ang 55-49 abante sa pagsasara ng third period ay kumamada ang Red Warriors sa fourth quarter kung saan nila ibinaon ang Growling Tigers sa 73-60 mula sa triple ni Villegas sa huling 1:28 minuto nito.
Nagsumite si Nic Cabanero ng 19 points, 14 rebounds at 4 assists para sa UST, habang may 12 at 11 markers sina Ivan Lazarte at Adama Faye, ayon sa pagkakasunod.
Sa ikalawang laro, pinabagsak ng nagdedepensang University of the Philippines ang Ateneo sa overtime, 76-71, para sumosyo sa NU Bulldogs sa liderato sa pareho nilang 4-1 marka.
- Latest
