Altas, Cardinals asam ang panalo
MANILA, Philippines — Kapwa pupuntiryahin ng Perpetual Altas at ng Mapua Cardinals ang maitayo ang 2-0 record sa pagsagupa sa magkahiwalay na kalaban sa 97th NCAA men’s basketball tournament sa La Salle Greenhills Gym.
Lalabanan ng Altas ang San Sebastian Stags ngayong alas-12 ng tanghali kasunod ang pakikipagtuos ng Cardinals sa Jose Rizal Heavy Bombers sa alas-3 ng hapon.
Magkasosyo sa liderato ang nagdedepensang Letran Knights at San Beda Red Lions sa magkapareho nilang 2-0 baraha kasunod ang Perpetual at Mapua na may magkawangis na 1-0 marka.
Umiskor ang Altas ni coach Myk Saguiguit ng 77-56 panalo sa Heavy Bombers sa pangunguna nina veterans Kim Aurin at Jielo Razon.
“Ang tingin ko talagang magiging consistent iyan dahil they are very ready for this Season 97,” sabi ni Saguiguit sa kanyang koponan.
Determinado naman ang Stags na makabangon mula sa 63-65 pagkatalo sa Arellano Chiefs.
- Latest
