John Marvin Miciano hahabulin ang Grand Master title

MANILA, Philippines — Isusulong ni John Marvin Miciano ng Go For Gold Philippines ang kanyang pangarap na makakuha ng Grand Master norm sa paglahok sa Eastern Asia Chess Championship sa Ulaanbaatar, Mongolia.

“I need to compete in more international tournaments with highly-rated players and I’m hoping to get my first GM norm here in Mongolia,’’ wika ng 18-anyos na si Miciano.

Naniniwala ang Asian Youth chess champion na magiging maganda ang kanyang ipapakita sa nasabing FIDE-rated tournament na matatapos sa Abril 16.

Tatlong GM norms na lamang ang kailangan ni Miciano, ang pinakabatang International Master at suportado ng Go For Gold para masundan ang mga yapak ni chess whiz Wesley So.

“When I saw his credentials, I knew he has great potential to become a GM,’’ sabi ni Go For Gold godfather Jeremy Go. “He deserves our support.’’

Nakawala sa chess prodigy mula sa Davao City ang GM norm na 0.5 points nang tumapos siya sa No. 12 mula sa lumahok na 242 sa 22nd Hogeschool Zeeland Tournament sa Vlissingen, Netherlands noong Agosto ng 2018.

Pumuwesto din si Miciano sa No. 11 sa hanay ng 105 chessers sa nakaraang Open International De Sitges sa Spain kung saan naglaro ang maraming GMs at IMs.

Sa Mongolia meet ay maglalaro ang Philippine junior chess champion ng nine rounds sa FIDE Zone 3.3 tourney laban sa mga top players sa Asya, kabilang ang mga GMs ng Vietnam at Indonesia.

Maliban kay Miciano, itinataguyod din ng Go For Gold si skateboarder Margielyn Didal, ang Philippine dragonboat team ng Philippine Canoe-Kayak Dragonboat Federation at sina cycling hero Rex Luis Krog at reigning Southeast Asian Games men’s triathlon champion Nikko Huelgas.

Ang Go For Gold ay sumusuporta din sa wrestling, sepak takraw, sa Philippine Air Force volleyball squad at sa San Juan Knights-sa MPBL.