Clemente 6-golds, Tagle 7-golds

Iloilo City – Lumangoy pa ng tigalawang gintong medalya bawat isa sina Alexi Kouzenye Cabayaran ng Negros Occidental at Gulliver Clive Clemente ng Antique sa pagtatapos ng swimming competition kahapon sa 2019 PSC-Batang Pinoy Visayas Qualifying Leg sa Iloilo City Sports Complex dito.

Nakopo ng 14-anyos na si Clemente ang ginto sa boys 13-15 year 100-m breaststroke (1:13.24) at sa 100-m individual medley para mag-uwi ng kabuuang anim na gintong medalya sa kumpetisyon matapos manalo ang Grade 8 student ng Antique National High School sa  200-m breaststroke (2:37.46),  400-m individual medley (5:18.92), 50-m breaststroke  (33.48) at sa 200-m IM (2:26.75) noong Martes.

Hindi rin nagpahuli ang 14-anyos na si Cabayaran matapos masikwat ang ginto sa girls 13-15 year 50-m freestyle (28.92) at sinundan pa sa magaang panalo sa 200-m freestyle (2:17.65) para  sa kabuuang limang ginto kabilang na ang 100-m backstroke (1:10.64), 100-m freestyle (1:02.36) at 50-m backstroke (32.01) noong Lunes.

Tumapos din na may tig-apat na gintong medalya sina Coby Rivilla ng Ormoc City, Jude Anthony Presas ng Tagbilaran City at ang mga Negros Occidental teammates na sina Troy Castor, Jay-R Punzalan at Earl Jude Buncio.

Nag-uwi rin ng tatlong ginto si Rex de la Cruz Jr. ng Ormoc City at tig-dalawa naman sina Kyle Soguillon ng Kalibo, Aklan at Rianna Montelibano ng Negros Occidental.

Samantala, umani rin ng pitong gintong medalya ang 10-anyos na si Naina Dominique Tagle sa archery event upang maging most bemedalled atlete sa isang linggong kumpetisyon.

Nasungkit ng pinakabatang atleta sa Batang Pinoy na si Tagle, kapatid ni national team member Nicole, ang panalo sa 20-m, 30-m, 40-m, 50-m, fita event, mixed team at Olympic round event.

Nakakuha rin ng tig-anim na ginto bawat isa sina Prisa Herren Lofranco at Godwell Maloloy-on ng Mandaue City sa medal-rich archery.

Nanatili pa rin ang host Iloilo City sa liderato ng me-dal tally sa kanilang 35- 27- 29 gold-silver-bronze haul kasunod ang Negros Occidental sa 29-16-16.