Training center sa Clark; sports complex sa Tarlac

MANILA, Philippines – Hindi isa kungdi dalawang lugar ang siyang tinukoy para pagtayuan ng makabagong sports facilities sa bansa.

Tinanggap ng working committee na nagnanais na makita ang Pilipinas na magkaroon ng bagong training center,  ang suhestiyon ni POC president Jose Cojuangco Jr. na kunin ang lupang ipinagkakaloob ng Clark International Airport Corporation  (CIAC) at ng Bases Conversion Development Authority (BCDA) para makumpleto ang short at long range plan para sa palakasan ng bansa.

Sinamahan nina House Committee on Youth and Sports chairman Davao del Norte Congressman Anthony del Rosario at vice chairman Pampanga Representative Joseller “Yeng” Guiao ang mga sports officials na nagsagawa ng ocular inspection sa mga lupain na inaalok ng CIAC at BCDA kahapon.

Matapos mag-ikot ay nagsagawa ng committee hearing sa CIAC office sa Clark, Pampanga para sa itinutulak na batas sa pagkakaroon ng bagong training center.

Tinuran ni Cojuangco na makabubuti sa bansa na kunin ang dalawang site dahil ang 50-ektar-yang  lupain ng CIAC ay puwedeng pagtayuan na ng training center habang ang 35-ektaryang lupain ng BCDA sa Capas, Tarlac ay puwedeng ireserba para dito itayo ang makabagong sports complex upang makapagtaguyod uli ang bansa ng malala-king kompetisyon tulad ng Asian Games.

“I propose that we have both if it’s possible,” wika ni Cojuangco. “If we look at the future, it will be very advantageous to the country not only to the athletes.”

“I don’t want to sound greedy but I support pre-sident Cojuangco’s proposal to have a short-medium and long term goal,” sabi naman ni Garcia.

Dumalo rin si CIAC President at CEO Igmidio Tanjuatco III at BCDA Project Manager Tom Macrohon at parehong sang-ayon sa kagustuhan ng PSC at POC.

Ngayong tapos na ang pagtukoy sa lupang gagamitin, sunod na gagawin nina Del Rosario at Guiao ay ang kumbinsihin ang Senate Committee on Youth and Sports sa pangunguna ni Senator Sonny Angara para masuportahan ang kanilang isinususog na batas.

“This is the easiest part. The hardest part is getting the law approved. Hopefully we can do this,” wika ni Del  Rosario.

Sakaling tumulong ang Senado at nasuportahan ang bansa, bago matapos ang taon ay maaari nang magsimula ng pagpapatayo ng training center sa Clark. (AT)