IEM Volley Masters nakalapit sa Finals

MANILA, Philippines - Binalikan ng Instituto Estetico Manila Volley Masters ang Rizal Technological University Blue Thunders sa 25-14, 25-22, 25-16 straight sets dominasyon upang iusad ang isang paa patungo sa championship sa men’s division ng Shakey’s V-League Season 11 Third Conference kahapon sa The Arena sa San  Juan City.

Si Jeffrey Jimenez ay may 9 kills, 3 service aces at 1 block tungo sa 13 puntos para pangunahan ang mabangis na laro ng Volley Masters upang saluhan uli sa unang puwesto ang pahingang Systema Active Smashers sa 3-1 karta sa ligang inorganisa ng Sports Vision katuwang ang Shakey’s at may ayuda pa ng Accel at Mikasa.

Hindi nagpabaya ang tropa ni coach Ernesto Balubar dahil sina Jason Canlas, Eden Canlas at Karl Ian Dela Calzada ay may tig-pitong puntos habang si Michael Ian Conde ay may anim na hits na lahat ay ginawa sa ikatlong set para ipakita ang balanseng pag-atake.

Tumagal lamang ang laro sa isang oras at 13 segundo dahil puno ng determinasyon ang Volley Masters na maipaghiganti  ang five-sets pagkatalo sa RTU sa unang pagkikita.

Lamang na noon ang IEM, 2-1, pero bumigay sila sa huling dalawang sets para sa natatanging pagkatalo sa liga.

Si Abdul Majid Jaidal ay may 8 puntos para pa-ngunahan ang Blue Thunders na bumaba sa 1-3 karta at makasama ang FEU Tamaraws. (AT)