Mas exciting ang panalo ni Doliguez kay Caro

MANILA, Philippines - Kumpara sa naging laban nina Timothy Bradley, Jr. at Juan Manuel Marquez, mas naging maaksyon naman ang non-title fight nina Jun ‘Hercules’ Doliguez ng Sarangani Province at Giovanni Caro ng Mexico.

Tinalo ni Doliguez si Caro sa ika-2:53 minuto ng sixth round para sa kanyang TKO (Technical Knockout) victory sa kanilang six- round featherweight bout sa undercard ng Bradley-Marquez championship fight na ginanap sa Las Vegas, Nevada.

Itinaas ng 22-anyos na si Doliguez ang kanyang ring record sa 17-0-2 win-loss-draw record kasama ang 13 KOs kontra sa 24-14-4 (19 KOs) ng 29-an-yos na si Caro.

Ilang matutulis na head shots at left straight ni Doliguez ang nagpadugo sa mukha ni Caro sa fifth round.

Sumabay si Caro, natikman ang kanyang pangatlong sunod na kabiguan, kay Doliguez bago tamaan ng isang mabigat na left hand sa sixth round.

Nakatayo pa ang Mexican hanggang muling kumonekta si Doliguez ng isang left straight sa huling pitong segundo para tuluyang ipatigil ni re-feree Vic Drakulich ang laban.