Alaska pasok sa PBA Finals; Ginebra, TNT magkikita ngayon

MANILA, Philippines - Nasungkit ng Alaska ang unang tiket sa championship series ng 2013 PBA Commissioner’s Cup nang talunin ang San Mig Coffee, 83-78, sa ha­rap ng 10,775 fans sa Smart Araneta Coliseum ka­gabi.

Naitala ng Aces ang panalo mula sa pagkabaon sa 15 puntos sa third quarter para magwagi sa kanilang best-of-five semifinals duel sa 3-1.

Matapos matalo ng siyam na sunod sa da­ting head coach nitong si Tim Cone  simula noong nakaraang season hanggang sa Game 1 ng serye, tinalo ng Alaska ng tatlong sunod ang San Mig Coffee para makabalik sa PBA Finals sapul noong 2010 Fiesta Conference sa piling ni Cone kung saan nakopo din nila ang kanilang huling titulo.

Nalimitahan ng Mi­xers si Alaska import Ro­bert Dozier sa kanyang PBA career-low na anim na puntos, pero lima dito ay kanyang naibuslo sa huling 2:05 minuto ng laro kung saan kumawala ang Aces mula sa 77-76 kalamangan.

Sina Cyrus Baguio, JVee Casio at Calvin Abueva ang nakaiskor ng double figures para sa Alaska na pumasok sa pang-26th na Finals overall o mula nang pumasok sa liga noong 1987.

Ang 23 puntos at 22 rebounds ni Denzel Bowles ang nagbida para sa Mixers na hindi nagamit ang may back injury na si James Yap.

Samantala, maghaharap para sa hu­ling pagkakataon ang Talk ‘N Text at ang Barangay Ginebra para sa karapatang makapasok sa Finals.

Nakatakda ang ‘sudden-death’ Game 5 ng best-of-five semifinals se­r­ies ng Tropang Texters at Kings ngayong alas-6:15 ng gabi sa Smart Ara­neta Coliseum na ina­asahang mapupuno hanggang sa bubungan.

Nakataya para sa Talk ‘N Text ang pangalawang sunod na Finals at pang-pito sa huling  walong con­ferences at pagkakata­on na muling ambisyunin ang Grandslam matapos mapanalunan ang Philippine Cup noong nakaraang Enero.

Para naman sa Ginebra, naitabla ang serye nang kunin ang isang 104-101 panalo sa Game 4 no­ong Biyernes, pagka­kataon naman nila itong makabalik sa PBA Finals makaraan ang dalawang seasons.

Isang panalo na lamang ang kailangan ng Kings para kumpletuhin ang kanilang pagbabalik mula sa 0-4 at 1-5 na mga simula sa conference.

Mababale-wala ang ka­nilang mga pinaghira­pan, kabilang na ang pag­panalo ng tatlong ‘do-or-die games’ sa playoffs at pagkawala ng kanilang lea­ding local scorer na si Mark Caguioa, kapag hindi nanalo ang Ginebra sa Talk ‘N Text.

“Kapag inisip kasi na­ming we’ve already accomplished anything by co­ming this far, walang mangyayari sa amin,” wi­ka ni head coach Alfrancis Chua.

Alaska 83 - Baguio 16, Casio 15, Abueva 14, Thoss 9, Dela Cruz 9, Espinas 7, Dozier 6, Hontiveros 5, Jazul 2, Belasco 0.

San Mig Coffee 78 - Bowles 23, Devance 18, Barroca 14, Simon 10, Pingris 5, Mallari 3, Reavis 3, Najorda 2, Gonzales 0, De Ocampo 0.

Quarterscores: 25-24; 34-48; 60-64; 83-78.