Hahabol na ang NLEX

MANILA, Philippines - May tiwala si NLEX coach Boyet Fernandez na handa na uling lumaban ang kanyang mga alipores para paigtingin ang paghahabol sa ikalimang sunod na titulo sa PBA D-League.

Galing ang Road Warriors sa 90-54 panalo laban sa baguhang Hog’s Breath para wakasan ang dala-wang dikit na pagkatalo na bumulaga sa koponan.

“Marami kaming natutunan sa mga talo namin and hopefully magtutuluy-tuloy na ang pagpapanalo namin,” wika ni Fernandez.

Katunggali ng NLEX ang Boracay Rum sa ganap na ika-12 ng tanghali sa pagpapatuloy ng Foundation Cup ngayon sa JCSGO Gym sa Quezon City.

Ang Waves ay may 3-2 karta at galing din sa 85-75 panalo sa EA Regen Med sa huling laro.

Samantala, manatili sa tuktok ng team standings ang balak gawin ng Fruitas sa pagharap sa Cagayan Valley sa ikalawang laro dakong alas-2 ng hapon habang ang tagisan ng Cafe France at EA Regen Med ang huling laro dakong alas-4 ng hapon.

Hindi pa natatalo ang Shakers matapos ang tatlong laro at papasok sila sa labanan mula sa 13-araw na pahinga upang maging sariwa sa inaasahang mahigpitang labanan.

“Ang mahabang pa-hinga ay nakatulong para mabawi namin ang aming lakas matapos ang mahihirap na laro sa huling dalawang labanan,” ani Shakers coach Nash Racela.

Saluhan uli sa ikalawang puwesto ang pahi-ngang Blackwater Sports ang layunin ngayon ng Bakers.